المطبختحدي رديف (١)سلسة تدويناتيوميات

تابع التدوينة الاولى مدونات طبخ!!


اثناء تصفحي للنت من فترة طويلة قابلت عدة مدونات تخصصها في الطبخ، مع الاسف المدونات تحديثها قديم ، بعضها من سنة وبعضها اكثر .. لكن بعض المدونات محتواها مميز ومرتب وقوي .. وبعضها عادي .. استعرضها معاكم هنا:

الهام بخور (طعام وحكايا)

بدات الهام تكتب في مدونة على ووردبريس وعرفتها من هناك، لكن بعد كذا انتقلت لكارميلا بلوج – ومع الاسف ما احب كارميلا لانها بدون قارئ خلاصات و متابعة المدونات هناك تطلب زيارة المدونة باستمرار لمتابعة الجديد- عموما مع الهام ماعندي مشكلة ابدا كل ما تذكرت ممكن افتح مدونتها واقرأ.. تدويناتها هو نوع من انواع التدوين اللي اتمنى اوصل له .. ما تتحدث بس كوصفة ، لكن ما خلف الوصفة كمان.. بالاضافة لحديثها المستمر حول الخضار والفاكهة الموسمية وكيفية الاستفادة منها .. الشيف المحترف مو بس ينقل الوصفة ويطبقها بحذافيرها بل يساعد في ايجاد ارتداد للوصفة في عالمنا ومنطقتنا وثقافتنا وهذا اللي استشعره في طبقها..

بعد زواجي قررت اقتني عجانة ، وزوجي فاجأني بعجانة كيتشن ايد النوع كلاسيك، فرحت فيها جدا ، لكن لقلة خبرتي حينها كل ما اجرب وصفة عجينة ابببدا ما تزبط ، تصير طرية واضطر اضيف ملعقة دقيق ملعقة دقيق ملعقة ماء وهكذا لما اتعب واكمل عجنها بيدي -وكنت شاكه اذا المشكلة فيني او في العجانة ،خاصة انه النوع المشهور هو Artisan بين الناس- ثم اخيرا وقعت على عجينة الهام – مالقيت رابطها مع الاسف – بس اتذكر انها كانت مكتوبة بالتفصيل باستخدام الدقيق الكويتي (مثلا كانت كاتبة انها كوبين + ملعقتين كبيرة دقيق كويتي) وبالفعل كان عندي دقيق كويتي وزبطت اخيرا عجينة العجانه وحصلت على عجينه قوامها متماسك وطري..-لاحقا اتعلمت انه بعض انواع العجائن تكون رطوبتها اعلى، فطبيعي شكلها في العجانه وهي طرية غير متماسكه-

مستكة

مستكة تصويرها واخراجها فنان ومدونتها فيها هدوء وروقان .. وصفات البكرين عندها يشهي .. وانستقرامها متجدد من فترة لفترة احب اروح ابحث خصيصا عن وصفات عندها.. اه

اهم ميزة احبها واهتم فيها في المدون تكون روحه ووصفاته متجددة وخاصة فيه..احيانا احس النت كله نفس الافكار.. مستكة او عفاف اذكر برمضان من الرمضانات كانت تعيد تطبيق وصفات رمضان من كتاب قديم عندها، هالشي اعطى انستقرامها احساس مختلف عن باقي الحسابات.

الفرن الدافئ

المدونة محترفة، جربت مرة وحدة وصفة كيكة الكرك (اعتقد كذا كانت اسمها بالمدونة ) بس ما زبطت معايا، احس صاحبها في مستوى عالي حبتين ، بس محتوى ومجهود يشكر عليه..

My Kitchen

&

Hissa’s Kitchen

مدونتين انحط فيهم جهد نبيل.. والان موجودة للي يحب يطلع عليها ..كانت محفوظة عندي في قارئ الخلاصات ..


وأخيرا ..اتذكر مدونة اخيره لكنها مع الاسف اختفت، اخذت منها وصفة كيكة الكل يسالني عنها -راح اشارك وصفة الكيكة اكيد لاحقا- ،والسوال المطروح الان،، هل احد ما يعرف اي مدونة متخصصة في الطبخ اقدر اضيفها مع المجموعة!؟ شاركوني في التعليقات اذا تحبوا..

هذه التدوينة ضمن سلسة الكتابة اليومية في #تحدي-رديف اليوم الثامن.

Tagged:

اترك رد

Related Posts

%d مدونون معجبون بهذه: