هذا العنوان كان ضمن التدوينة السابقة، وفصلته في تدوينة مستقلة لاني اعتقد انه من اكثر العناوين اللي تلامس كل أم راح تصحى الصباح وتفكر “اش راح اطبخ اليوم” ..قد تكون الام سيدة عاملة تحتاج تحدد اش حتطبخ عشان تختصر على نفسها الوقت والجهد، وممكن انها في المنزل وتعرف انه عندها الوقت والخيارات الغير منتهية لذلك مو قادرة تحدد اش بالضبط الطبق اللي حتصنعه !؟

نصيحة مبدئية قبل ما ابدأ : حاولي مثل ما انا احاول مرة بعد مرة اني ما اطرح هالسوال على نفسي قبل موعد الطبخ بساعة او ساعتين ، في الحقيقة لو كنت اتقلب في الصباح على سريري ومو عارفة اش حيكون على الغداء استمر في النوم ” ثم لاحقا اجري في المطبخ عشان ألحق أخلص”.

تعودت عموما اني احاول قدر المستطاع احدد الطبق قبلها بليلة.. كثير نصائح تذكر انه الافضل تجهيز جدول بالوجبات لاسبوع كامل.. هذه الفكرة ما نجحت معايا لاني اشتهي شغلات معينة فجأة، واحيانا يتلخبط جدولنا بالتزامات مفاجئة.. لذلك التخطيط الذهني بشكل عام بتصور شكل الاسبوع ناسيني -امكن لاني ربة منزل وماعندي التزامات كثير-.

طيب اذا كنت محتارة “اش راح اطبخ!” اول شي عادة احدد نوع البروتين اللي حستخدمه “لحمه؟ دجاج؟! صدور دجاج ولا دجاجة كاملة!؟ سمك ولا تونة!؟” اذا كنت مشتهية طبق معين راح يختصر علي الوقت اكيييد.. اثناء اعدادي هذا الموضوع سويت بحث سريع ولقيت نفس النصيحة، لكن التقسيم كان حسب نوع الطبخة اذا ايطالي او هندي او مكسيكي.. او هل عندي باذنجان كثير او كوسه وابحث عن وصفة مخصوصة!؟ هذا التقسيم يساعدني ابحث بالضبط كيف..البحث بعد كذا يكون في بنترست او يوتيوب او عن طريق كتاب.. صاحبة المقالة* تقول كل هالبحث راح يكون سهل وبسيط -اطلقت عليه اسم البحث الكسول- مو لازم تعملي لسته او تكتبي في ورقة وقلم، بحث نظري.

من الاشياء اللي تساعدني كمان وريحتني جدا طريقة تقسيم الايام..الاحد يكون نوع بروتين(سمك-لحم) الاثنين طبق دجاج رئيسي(كبسة-برياني-مندي…الخ) الثلاثاء تسخين،الاربعاء اي نوع ايدام ،الخميس والجمعة اجازة ،السبت يكون فطور متاخر/مكرونات.. احيانا يكون فيه يوم ساندوتشات/برجر.. ممكن يوم لتجربة الاطباق الجديدة ..وهكذا كلا بطبعه وذوقه..التحديد يريحني ويسهل علي.

تلميح

لمحة سريعة شوية افكار او تكنيك اتعلمته مؤخرا .. اخر تكنيك وصلت له كان عجيب ..طريقة صنع البيض مع الزبدة ،الطريقة اقترحتها منى في سناب شات وبعد ماجربتها اعتقد لازم غيري يذوقها ،الفيديو بالاسفل يشرح الطريقة:

https://youtu.be/PUP7U5vTMM0

طريقتها اني احط البيض مع قطعة من الزبدة في الكسرولة ثم نحطها على النار،نخفق المزيج بملعقة اثناء طهيه على النار ونستمر في الخفق ،لما ابدأ احس مزيج البيض يتماسك اضيف القليل من الكريمة (انا استخدمت شريحة جبنة شيدر وكانت لاتزال لذيذة) وبعد ما تنضج تماما نضيف الملح والفلفل الاسود..حقيقي طريقتها لذيذة وحلوة..

*هذا الموضوع للاستزادة: https://www.thekitchn.com/recipe-baked-potato-shakshuka-226864

هذه التدوينة ضمن تدوينات سلسة #تحدي_رديف اليوم الرابع 🌸✨

من اليمين لليسار اسماء الكتب:

إبداع للطبخ

هذا الكتاب جميل، حجة شراءه هو وصفات الحلى اللذيذة، اقترحته قريبتي لأمي، وأمي اشترته، وأنا استعرته منها بعد كذا.. اقلب صفحاته هو وكتاب النخبة غالبا اذا كنت ابحث عن فكرة لغداء- وهذه وحدة من الأجوبة على سؤال اش راح اطبخ اليوم؟- مو كل وصفاتها لوجبة الغداء ناسبتني، لكن تعطيني لمحة سريعة ثم ابحث في اليوتيوب. حلوياتها حلوة وغريبة فعلا، مشكلة الكتاب حقيقي في حجمه لأنه عريض وكبير وثقيل – متعب اتنقل به من مكان للثاني-.

Quick&easy

الكتاب اللي كنت اضع عليه آمال كبيرة وقت شراءه، الطبخ في اقل من ٣٠ دقيقة.. اعتقد العنوان جذاب فعلا .. لكن الوصفات أغلبها تعتمد على منتج ثاني من قبل – يعني على سبيل المثال تحضير البيتزا يتطلب اني اشتري عجينة بيتزامفرودة مثلجة تباع في السوبرماركت ، مع صلصلة بيتزا جاهزة ، وبالتالي التحضير حيكون مختصر وحياخذ وقت قليل- صحيح الأفكار بطلة بس افضل عادة اني اصنع كل شيئ بنفسي ، لذلك كوصفات جاهزة ماساعدتني كثير، لكن افكارها بطلة، التقديم فنان، واهم شي كاتبة في المقدمة نصائح بشكل عام ، ممكن اترجم بعض منها ونتشاركها لاحقا.

مجلة مطبخ قودي (١) (٢)

المجلات قديمة عندي ، من الأعداد الأولى، بس احيانا يحطوا وصفات تقديم جديدة، احب اقلب صفحاتها من فترة للثانية، السبب اللي خلاني أقع في حبها لأول مرة هو اكتشافي السلطة جار عندهم Salad Jars وهي السلطة المقطعة الجاهزة في جرة، منظرها جميل وتجهيزها ممكن يكون مرة خلال الاسبوع فقط.

كوكباد ( أطباق دجاج شهية)

شفت الكتاب على رفوف مكتبة جرير، والكتاب اعتقد تجميع من وصفات موقع كوكباد، ولأن الدجاج هو نوع البروتين المفضل عندي ما ترددت أبدا في شراءه، وصفاته خليط من سلطات ،ومكرونات، صواني، وطبق مكسيكي كمان، هل أحبه؟ نعم ، هذا من كتبي المفضلة طبقت كذا وصفة ، بعضها لذيذ وبعضها عادي، بعضها فيه تفاصيل واعداد الطبق يتطلب وقت ، والاخر سهل وسريع، لكني أحبه واسلفه لأهلي، ثم اندم واستعيده منهم ولو ضاع بشتريه مرة ثانية.

Make-Ahead

هذا الكتاب وقعت عليه مصادفة، وأنا خارجه من مكتبة جرير ، وقفت عند قسم الكتب المخفضة ولقيته، سبب شرائي له هو شعار الشركة امريكان تيست كتشين، وهالشركة مدحتها مرة وحده في انستقرام- ابحث لاحقا عن اسمها- لذلك اخذته بدون تردد ولا ندمت، الكتاب – مثل اغلب الكتب الأجنبية – تغذية بصرية في الطبخ، ثم التفاصيل الدقيقة للوصفات وليش هذه الوصفه لازم اطبقها وضمن التفاصيل وعند نقطه محددة يقترح علي امكانية تفريزها واكمالها لاحقا وقت التقديم – الكثير من الوصفات اللي ممكن تتفرز- والنصائح الموجودة عموما في اختيار الطبق او فرد العجين او … الخ يعني احيانا اخرج منه بمعلومة من الهوامش والتيبز الموجودة على الجوانب.. هل انصح فيه؟ ايوه ولا.. ايوه بسبب اللي ذكرته، ولا لاني طبقت عدد محدود من وصفاته ماجربتها كلها فمو متأكدة اذا كانت جيدة بالفعل.. بسبب اللغة احيانا اخذ وصفة من الكتاب وابحث عنها في اليوتيوب واطبق – مثل هالوصفة “Scallion Pancakes” اللي شفت صورها واتحمست لها جدا بس ماقدرت اتخيل اش كان يقصد الكاتب وبحثت عنها وطبقتها بطريقة اليوتيوب في النهاية 🙂 _{– والوصفة بشكل مختصر هي شباتي الهندي العادي بطبقات بس أول فرد للعجينة يحطوا فوقها بصل أخضر ثم يلفوها ، طبعا فيه تفاصيل اكثر ومختلفة للي يتابع الفديو-}

كتاب النخبة

اعتقد هالكتاب موجود في كل مطبخ وكل بيت، كان في أوج شهرته من قبل عشر سنين امكن !! قبل فترة اطلعت عليه وحسيت كثير من وصفات انستقرام تعتمد على افكاره، الكاتبة ابدعت فعلا وشرحت بالتفاصيل كل طبق، وفي مقدمة الكتاب حطت المقاييس والمعايير اللي تستخدمها وصور لبعض المنتجات الغير معروفة اللي استخدمتها.. طبعا الكتاب يعود لأمي، وانا استعرته عندي استفيد منه.

—–

هذا مختصر كتبي اللي احبها وموجودة عندي، الكتب بالانجليزي تعطيني أفكارواستمتع بتقليب صفحاتها ، لكن وقت الشدة والضيق ارجع بسرعة للكتب بالعربي.. الطبخات الشرقية لوقت الغداء والعشاء والمعجنات اكيد في النخبة والابداع، لكن تجربة شي جديد وخفيف حيكون بالعكس..

هذا مختصر للي كنت حابه اتكلم عنه .. اعتقد لو هذه التدوينة بقيت كمسودة اضيف واعدل كان اخذت اكثر من كذا سوالف وتفاصيل وامكن سويت جزء ثاني.. اتمنيت لو اضيف صور اكثر من داخل الكتب..

لسه قدامي ٣٧ يوم باذن الله 🙂

هذه التدوينة ضمن سلسلة #تحدي-رديف ٣-٤٠

الكتب عامة من الأشياء اللي احب اقتناءها جدا، وعشان الميزانية المحدودة كنت دايما احاول أتجنب شراء الروايات واكتفي بقراءتها إلكترونيا – لأنها في العادة تُقرأ مرة وحدة فقط – واحاول اشتري الكتب القيّمة اللي اتفق “جمع غفير من الناس” على فائدتها، وأحيانا أٌخرى اشتري الكتب لأن الكاتب من مفضلاتي الشخصية ، ومن فترة لأخرى ممكن اشتري روايات مشهورة وذات مغزى، او ربما لاني قرأتها مرة إلكترونيا وأعجبتني وقررت انها تستحق القراءة مرة ثانية وثالثة وتصلح للإعارة في أحيان أٌخرى، ولاحقا هالفترة صارت كتب الطبخ هي النوع اللي يستهويني وادفع عليه الفلوس، ولازم أفكر ألف مرة قبل ما اشتري اي كتاب طبخ – بسبب اسعارها العجيبة-.

كم كتاب طبخ اشتريت!؟ مو كثير ، اعتقد مجموع الكتب اللي اشتريتها + الكتب اللي استعرتها من امي + المجلات البسيطة القديمة اللي عندي يجي مجموعهم تقريبا ١٠ كتب- بصراحة اعتقدت الرقم اكثر- ، وهي متعتي الآن في اكتشاف صفحاتها..

هل فيه فرق بين الكتب العربية والانجليزية، طبعا الاجابة أكيييييييد فيه و نعم فرق شاسع في المحتوى والافكار والاسعار-معلش لازم اركز على موضوع السعر لانه ما يساعد في اثراء مكتبتي المتواضعة هههه-.. مو معقول أسعار كتب الطبخ الموجودة في جرير أسعارها مبالغ فيها جدا جدا . طبعا اتكلم عن الكتب الكبيرة وليست الكتيبات الصغيرة. – ومكتبة جرير هي مصدري الأساسي لاطلاعي عالكتب وجديدها-

اخر مرة رحت – بعد انقطاع مدة طويلة – وقفت امام رف الكتب العربي وحسيت باحباط، تقريبا نفس العناوين مافي شيئ جديد من قبل كورونا- وكنت متحمسة أشتري كتاب “١٥ ثانية” – لأني جربت كم طبق من صفحتهم وكانت لذيذة- لكن ترددت بعد ما شفت على بطاقة السعر ١٨٥ ريال!!؟

أعتقد الانترنت -واليوتيوب بشكل خاص- قرب لنا اسرار الطبخ وفنياته، هل يكفي اني اكتب اسم الوصفة واستمتع بالنتائج!؟ لا، الانترنت يعرفك بتاريخ الطبخة وفين اشتهرت ويدخل البيوت والمطاعم ويكشف لنا الاسرار والتكتيكات لكل طبخه ولكل دولة بمختلف الاذواق والأشكال.

اليوم بس كنت أبحث عن “سلطة بيتزاهت” على امل اني اجد وصفه الجبنة البيضاء خاصتهم، وظهرت لي أشكال واصناف كثيرة، بعضها ماقد شفته، وبعضها تذكرته مصادفه – ومع الاسف الصنف اللي ابحث عنه مالقيته- لكن استبدلت سلطتي بسلطة ثانية من البطاطس اشتهيتها ..عموما هذا البحث ممتع.

كتب الطبخ مافيها هذا التنوع اللي يقدمه لنا انستقرام يوتيوب خاصة ..لكن الكتب تحتفظ به للابد،في المقابل النت مشتت اول..ولو ماعندك شيف مفضل تتابعه راح يكون الطبق موضع شك الى ان يتم تجريبه..

اتكلمت اليوم عن المطبخ والطبخ..بكرة بستعرض الكتب اللي املكها وليش احبها..وفين احتفظ بوصفاتي..عندي افكار كثيرة اتكلم فيها عن الوصفات والمدونات والبرامج اللي تتكلم عن الاكل عموما ..في الحقيقة مشروعي القادم اتعلم كيف اصمم كتب الطبخ..لان النماذج العربية الموجودة حاليا-عالاقل عندي او قلبت صفحاتها-متواضعة وبعضها مزعج للعين.. كتب الطبخ بالانجليزية ممتعة ممتعة حتى لو ما جربت وصفاتها..

هذه التدوينة ضمن سلسة #تحدي_رديف ٢-٤٠