من فين نجيب فكرة طبخة؟ | تلميح

هذا العنوان كان ضمن التدوينة السابقة، وفصلته في تدوينة مستقلة لاني اعتقد انه من اكثر العناوين اللي تلامس كل أم راح تصحى الصباح وتفكر “اش راح اطبخ اليوم” ..قد تكون الام سيدة عاملة تحتاج تحدد اش حتطبخ عشان تختصر على نفسها الوقت والجهد، وممكن انها في المنزل وتعرف انه عندها الوقت والخيارات الغير منتهية لذلك مو قادرة تحدد اش بالضبط الطبق اللي حتصنعه !؟

نصيحة مبدئية قبل ما ابدأ : حاولي مثل ما انا احاول مرة بعد مرة اني ما اطرح هالسوال على نفسي قبل موعد الطبخ بساعة او ساعتين ، في الحقيقة لو كنت اتقلب في الصباح على سريري ومو عارفة اش حيكون على الغداء استمر في النوم ” ثم لاحقا اجري في المطبخ عشان ألحق أخلص”.

تعودت عموما اني احاول قدر المستطاع احدد الطبق قبلها بليلة.. كثير نصائح تذكر انه الافضل تجهيز جدول بالوجبات لاسبوع كامل.. هذه الفكرة ما نجحت معايا لاني اشتهي شغلات معينة فجأة، واحيانا يتلخبط جدولنا بالتزامات مفاجئة.. لذلك التخطيط الذهني بشكل عام بتصور شكل الاسبوع ناسيني -امكن لاني ربة منزل وماعندي التزامات كثير-.

طيب اذا كنت محتارة “اش راح اطبخ!” اول شي عادة احدد نوع البروتين اللي حستخدمه “لحمه؟ دجاج؟! صدور دجاج ولا دجاجة كاملة!؟ سمك ولا تونة!؟” اذا كنت مشتهية طبق معين راح يختصر علي الوقت اكيييد.. اثناء اعدادي هذا الموضوع سويت بحث سريع ولقيت نفس النصيحة، لكن التقسيم كان حسب نوع الطبخة اذا ايطالي او هندي او مكسيكي.. او هل عندي باذنجان كثير او كوسه وابحث عن وصفة مخصوصة!؟ هذا التقسيم يساعدني ابحث بالضبط كيف..البحث بعد كذا يكون في بنترست او يوتيوب او عن طريق كتاب.. صاحبة المقالة* تقول كل هالبحث راح يكون سهل وبسيط -اطلقت عليه اسم البحث الكسول- مو لازم تعملي لسته او تكتبي في ورقة وقلم، بحث نظري.

من الاشياء اللي تساعدني كمان وريحتني جدا طريقة تقسيم الايام..الاحد يكون نوع بروتين(سمك-لحم) الاثنين طبق دجاج رئيسي(كبسة-برياني-مندي…الخ) الثلاثاء تسخين،الاربعاء اي نوع ايدام ،الخميس والجمعة اجازة ،السبت يكون فطور متاخر/مكرونات.. احيانا يكون فيه يوم ساندوتشات/برجر.. ممكن يوم لتجربة الاطباق الجديدة ..وهكذا كلا بطبعه وذوقه..التحديد يريحني ويسهل علي.

تلميح

لمحة سريعة شوية افكار او تكنيك اتعلمته مؤخرا .. اخر تكنيك وصلت له كان عجيب ..طريقة صنع البيض مع الزبدة ،الطريقة اقترحتها منى في سناب شات وبعد ماجربتها اعتقد لازم غيري يذوقها ،الفيديو بالاسفل يشرح الطريقة:

https://youtu.be/PUP7U5vTMM0

طريقتها اني احط البيض مع قطعة من الزبدة في الكسرولة ثم نحطها على النار،نخفق المزيج بملعقة اثناء طهيه على النار ونستمر في الخفق ،لما ابدأ احس مزيج البيض يتماسك اضيف القليل من الكريمة (انا استخدمت شريحة جبنة شيدر وكانت لاتزال لذيذة) وبعد ما تنضج تماما نضيف الملح والفلفل الاسود..حقيقي طريقتها لذيذة وحلوة..

*هذا الموضوع للاستزادة: https://www.thekitchn.com/recipe-baked-potato-shakshuka-226864

هذه التدوينة ضمن تدوينات سلسة #تحدي_رديف اليوم الرابع 🌸✨

اترك رد